تاند:( چارشنبه، د ميزان اته ويشتمه) روسي چارواکي خبرداری ورکوي، چې د طالبانو واکمنيدل په افغانستان کې د ثبات په مانا نه ده او د داعش او القاعدې په شان ترهګرې ډلې له دې بې ثباتۍ څخه غواړي ګټه واخلي.
دا خبرداری نن د افغانستان په اړه د مسکو غونډې د پیل په وخت کې د روسیې د بهرنیو چارو وزیر سرګي لاروف ورکړ.
لاروف زیاته کړه، ګڼې تروریستي ډلې غواړي چې له بې ثباتۍ څخه د ځان په ګټه کار واخلي خو د ټولو په سر کې اسلامي دولت او القاعده دي، چې یو وار بیا یې سرونه راپورته کړي، او د افغانستان په بېلابېلو برخو کې خونړۍ حملې کوي.
نوموړي د طالبانو واک ته رسېدو ته په اشارې وویل چې دا بدلون د ثبات راتګ نه شي ګڼل کېدای ځکه چې له یوې خوا په لنډ اټکلېدونکي وخت کې بل الترانتیف یا متبادل نه شته، له بلې خوا حکومت د نړیوالو له لوري په رسمیت نه دی پېژندل شوی او همداراز د کابل نوي چارواکي له اقتصادي، مالي ستونزو او بشري چلینجونو سره مخامخ دي.
په مسکو کې د افغانستان د مشورتي غونډې درېیم پړاو نن د دغه ښار په پریزدنټ هوټل کې پیل شوه.
په دې غونډه کې د سیمې د هیوادونو د استازو ترڅنګ د طالبانو د رييس الوزرا د مرستیال عبدالسلام حنفي او بهرنیو چارو وزیر امیرخان متقي په ګډون یو پلاوی ګډون لري.
د مسکو فارمټ غونډې له ۲۰۱۷ کال څخه پیل شوي خو دا لومړی ځل دی چې دې غونډې ته د افغانستان له لوري یوازې طالبان بلل شوي دي.
د روسیې د بهرنیو چارو وزیر پرون ويلي وو، چې په دې غونډه کې به له طالبانو څخه په افغانستان کې د ټول ګډونه حکومت د جوړولو غوښتنه هم وکړي.
د طالبانو د رئيس الوزرا مرستيال مولوي عبدالسلام حنفي د دې غونډې پر مهال غوښتنه کړې، چې روسيه دې د دوی رژيم په رسميت وپېژني.
په مسکو کې د افغانستان د پرځول شوي جمهوري نظام سفير سيد طيب جواد پرون مسکو ټایمز ته ویلي و، چې د روسیې د بهرنیو چارو وزارت د طالبانو د واکمنۍ د نه په رسميت پېژندلو ډاډ ورکړی..