تاند:( چارشنبه، د‌ ميزان اته ويشتمه) د حزب اسلامي ګوند مشر ګلبدین حکمتیار په یوه تازه مرکه کې له طالبانو غوښتي، چې د راتلونکي حکومت او ټاکنو په اړه ملت او نړیوالو ته خپل دریځ روښانه کړي.

حکمتیار له الجزیرې ټلویزون سره په دې مرکه کې اوسنی وضعیت پېچلی ګڼلی او ویلي، چې حاکم شوی طالب حکومت لنډمهاله دی.

د ده په وینا د دغه حکومت وخت نه دی معلوم، خو طالبان باید دا روښانه کړي، چې د راتلونکي حکومت بڼه به څنګه وي او له ټاکنو سره به څه کوي؟

دی زیاتوي، چې طالبانو تر اوسه په دې اړه ملت او نړیوالې ټولنې ته څه نه دي ویلي.

د حزب اسلامي مشر د مسکو د نننۍ ترسره کیدونکې ناستې په اړه ویلي، چې د طالبانو د ګډون له کبله به امریکایان پکې برخه وانخلي.

هغه له همدې کبله زیاتوي، چې دا غونډه به کومه پایله به هم ونه لري ځکه په وینا یې، مقابل لوری په کې نشته.

د حکمتیار په باور، له دې غونډې سره روسان غواړي، چې د نورو پر وړاندې طالبانو ته خپل پیغامونه ورسوي.

انجینر حکمتیار دا هم وایي، چې د مسکو غونډه کې به د افغانستان د ستونزې په اړه برخلیک ټاکونکې خبره نه وي.

‏دا جهادي مشر له دې سره خوا کې اوسنی اوس وضعیت د پخوا په پرتله ښه یادوي او وایي، چې لږ تر لږه هره ورځ ۳۰۰ تنه خپل ژوند له لاسه نه ورکوي، بهرنیان له افغانستانه وتي او جګړه دریدلې ده.

حکمتیار له ملت څخه غواړي، چې طالبانو ته وخت ورکړي ځکه اوس هم له ډېرو ستونزو سره مخ دي.

طالبانو د نوموړي د څرګندونو، خاصتاً د اوسني حکومت د مودې، د راتلونکي حکومت د څرنګوالي او ټاکنو په تړاو غبرګون نه دی ښودلی.