تاند:( سی شنبه، د ميزان شپږ ويشتمه) د پاکستان د کورنیو چارو وزیر شیخ رشید وايي، چې هېواد يې افغان تجارانو ته پينځه کلنې وېزې ورکوي.
هغه په يوه خبري غونډه کې وويل چې دا پريکړه د دغه هېواد د کابینې په غونډه کې شوې ده.
د شيخ رشيد په وينا، د دې تر څنګ دا پريکړه هم شوې ده چې اوس ټول افغانان کولی شي بغير له فیسه ان لاين وېزې واخلي.
د پاکستان د کورنیو چارو وزیر نه دي ويلي، چې د پينځه کلنو وېزو د پيل نېټه کومه ده.
شيخ رشيد زیاته کړه چې پخوا به يې اته نيم ډالره فیس اخیست چې اوس د دې کال تر اخره ځنډولی دی.
نوموړي وويل چې د جعلي وېزو د مخنيوي لپاره به له افغانستانه د هر ورتلونکي کس د ګوتو نښې يا فينګر پرنټ اخیستل کېږي.
څه موده مخکې د پاکستان صدراعظم عمران خان وويل، چې د قانوني اسنادو لرونکي افغانان د ګیټ پاس له سند پرته هم دغه هېواد ته ورتلای شي، خو په دې ژمنې عمل ونه شو.
افغانان په ټوله کې د پاکستان ورته ژمنو ته د شک په سترګه ګوري.