تاند:( دوشنبه، د ميزان پينځه ويشتمه) طالبان وايي، چېد بهرنيو چارو وزارت سرپرست يې مولوي اميرخان متقي بېګا ماښام په کابل کې د چين له سفير وانګ يو سره وکتل.
د بهرنيو چارو وزارت په يوه اعلاميه کې راغلي، چې په دې لیدنه کې د افغانستان او چين د بهرنيو چارووزيرانو پرناستې توافق وشو.
سرچينه وايي، چې د دې ناستې ځای او وخت به له سلامشورو وروسته وټاکل شي.
ويل شوي، چې په دې لیدنه کې د چين سفير هغه هېواد ته د جلغوزيو د صادراتو د بيا پيل خبر هم ورکړ.
د طالبانو بهرنيو چارو وزارت په دې اړه نور جزییات نه دي ورکړي.
افغانستان د ولسمشر غني په جمهوري نظام کې د هوايي دهليزونو له لارې چين ته د جلغوزیو صادرات پيل کړل، چې د جلغوزیو بيې ورسره خورا لوړې او افغانستان ته يې ډېره ګټه وکړه.
د طالبانو له واکمنیدو سره، د ډېرو نورو برخو په شان دا برخه هم سقوط شوه، چې د خلکو ډېر شکايتونه يې را وپارول.
چين د طالبانو له مهمو سيمه ييزو متحدينو څخه دی، چې د پاکستان په وساطت يې طالبانو سره ښې اړيکې ساتلي.
دغه هېواد که څه هم د طالبانو رژيم په رسميت نه دی پېژندلی، خو څه موده مخکې يې ورسره د ۳۱ ميليونه ډالرو د مرستې اعلان وکړ.
د ځينو شنونکو په باور، د روسیې په شان چین هم له متحده ايالاتو سره په دې سيالي کوي، چې طالبانو سره ښې او نيږدې اړيکې ولري او خپل نفوذ پرې زيات کړي.
طالب چارواکي بيا د متوازنو بهرنيو اړيکو ډاډ ورکوي او دا د خپل بهرني سياست اساس ګڼي.