تاند:( دوشنبه، د ميزان شپږ ويشتمه) د طالبانو د کورنیو چارو وزرات ویاند قاري سعید خوستي په نیږدې راتلونکي کې د افغان نجونو د تړل شویو ښوونځیو د بیرته پرانیستل کیدو خبر ورکړی.
نوموړي له الجزیرې ټلویزون سره په تازه مرکه کې ویلي، چې په دې اړه به رسمي اعلان زر د پوهنې وزارت له لوري وشي.
هغه زیاته کړې، چې طالبان هم د دغو ښوونځیو زر بیرته پرانیستل غواړي او په دې اړه هڅې روانې دي.
طالبانو د نجونو د ښوونځیو د تړل کیدو دلیل د دغو زده کړو لپاره د لازمو شرایطو برابرول ښودلي وو.
سره له دې، چې په افغانستان کې د نجونو او هلکانو ښوونځي سره جلا دي، خو طالبانو نه دي ویلي، چې د نجونو د زده کړو لپاره د مناسبو شرایطو له رامنځته کولو یې هدف څه شی دی؟
قاري سعید خوستي دا هم ویلي، چې د نجونو ښځینه ښوونکې به هم بیرته زر خپلو دندو ته ستنې شي.
دا په داسې حال کې ده، چې پر طالبانو د ښځینه وو د زده کړو او کار د حق د تلف کیدو له کبله په ملي او نړیواله کچه نیوکې ورځ تربلې په زیاتیدو دي.
څو ورځې مخکې د ترکیې د بهرنیو چارو وزیر چاوش داود اوغلو وویل، چې د یو شمېر اسلامي هېوادونو د بهرنیو چارو وزیرانو په ملتیا به کابل ته لاړشي، څو طالب مشران د نجونو د تړل شویو ښوونځیو بیا پرانیستو او دغه راز د کار پر وړاندې یې د رامنځته کړي ممانعت پای ته رسیدو ته وهڅوي.