تاند:( دوشنبه، د ميزان نولسمه) تر هغې وروسته، چې د طالبانو د لوړو زده کړو سرپرست وزیر مولوي عبدالباقي حقاني د څو پارونکو ويناوو په ترڅ کې د خلکو توند غبرګونونه راوپارول، د طالبانود رییس الوزرا مرستیال ملا برادر آخند نوموړی ورغوښتی دی.
باختر دولتي خبري اژانس د ملا برادر له لوري د مولوي حقاني ورغوښتل تاييد کړي، خو ليکلي چې هغه سره د لوړو زده کړو پر وضعیت، د پوهنتونو پر پيل او په دې برخه کې د خنډونو او ستونزو پر اوارولو خبرې شوي.
د طالبانو يوې مطبوعاتي سرچينې، چې نه غواړي نوم یې واخیستل شي، تاند وېبپاڼې ته وويل چې د مولوي حقاني پر له پسې پارونکو ويناوو د طالبانو په منځ کې هم حساسيتونه راپارولي او يوه برخه مشران يې ورته غوسه دي.
سرچينې دا هم وويل، چې که د طالبانو په کابينه کې بدلونونه راشي، د مولوي حقاني ايسته کول یا یې د دندې تغیر له لومړیتوبونو څخه دی.
د طالبانو د لوړو زده کړو سرپرست وزیر څو ځلې د افغانستان د تېر ۲۰ کلن تعليمي نظام په اړه پارونکې خبرې وکړې او دغه تعليمي او تحصيلي نظام يې تر سوال لاندې راوست.
د هغه پارونکو خبرو ته د بيان پر ازادۍ د طالبانو لخوا د وضع شويو قیوداتو باوجود خلکو توند غبرګونونه وښودل او ډېرو ځوانانو خو مولوي حقاني له دوی سره مناظرو ته هم وباله.
مولوي حقاني سره له دې، چې د طالبانو د لوړو زده سرپرست وزیر ټاکل شوی، خو خپله لوړې زده کړې نه لري او پوهنتونونو ته د پاملرنې پر ځای دا اکاډميک مرکزونه چېلنجوي او د مدرسو زده کړو ته پرې ترجيح ورکوي.
د يادونې وړ ده، چې نوموړي د ډېرو نورو طالب مشرانو په شان د اکوړه خټک له حقانيه مدرسې څخه فارغ شوی.
ياده مدرسه د پاکستان د يوه مشهور سخت دریځه مذهبي مشر مولانا سميع الحق له لوري جوړه شوې وه.
سمیع الحق د افغان طالبانو په معنوي پلار مشهور و، چې د ژوند تر پايه يې د دې ډلې ملاتړ کاوه او د تېر جمهوري نظام پر وړاندې يې په د طالبانو جګړه جهاد ګڼله.