تاند:( دوشنبه، د ميزان نولسمه) په پکتيا کې د طالبانو چارواکو د داعش ډلې د غړیتوب او انسان تښتونې په تور د ۷ تنو د نيولو خبر ورکړی.
په دې ولايت کې د اطلاعاتو او فرهنګ رئيس خالقيار احمدزي ويلي، چې د داعش ډلې د غړیتوب په تور ۵ تنه پرون د طالبانو استخباراتي ادارې نیولي.
هغه د دغو کسانو د نيول کيدو سيمه د پکتيا ولايت د احمد اباد ولسوالي ښودلې ده.
بل لور ته: د پکتیا د امنیې قومندانۍ مسوولین وايي چې تېره شپه یې د مرکز ګردېز تېرې ښوونځي ته څېرمه دوه انسان تښتوونکي نیولي او د دوی له منګولو یې یو ماشوم آزاد کړی دی.
طالبانو د تورنو داعشیانو او انسان تښوونکو په اړه ډېر جزییات نه دي رسنيز کړي.
څو ورځې مخکې دوی په خوست ولايت کې هم د داعش ډلې د غړیتوب او په خوست کې د بريدونو په تور د ۱۴ تنو د نيولو خبر ورکړی و.
د داعش ډلې ډېر شوي فعاليتونه په افغانستان کې د طالبانو د واکمنۍ پر وړاندې له لویو احتمالي ننګونو څخه ګڼل کېږي.
طالبان بيا وايي، چې داعش ورته خطر نه، بلکې يوه مزاحمتي ډله ده.