تاند:( دوشنبه، د ميزان نولسمه) د قطر په پلازمېنه دوحه کې پرون، د قطر په منځګړيتوب د طالبانو د اسلامي امارت او امريکا متحده ايالاتو د هيئتونو مذاکرات پاې ته ورسيدل.
په دې دوه ورځينيو مذاکراتو کې د ترسره شويو هوکړو ځينې جزييات نن په ډېر تفصيل رسنیز شوي دي.
د متحده ايالاتو د بهرنيو چارو وزارت، چې مرستیالې يې مېرمن وندي شرمن له طالب لوري سره د مذاکراتو مشري کوله، د طالب لوري مذاکراتي پلاوی مسلکي ګڼلی او ويلي، چې دوی به د طالبانو د چلند په اساس د دوی په اړه پریکړه وکړي.
متحده ايالاتو دغه راز ويلي، چې طالبانو سره په دې مذاکراتو کې د بشري مرستو د ترسره کولو په اړه موافقه شوې ده.
د بشري مرستو د څرنګوالي، مقدار او ترسره کيدو په اړه متحده ايالاتو ډېر جزییات نه دي ورکړي.
طالبانو بيا ويلي، چې دوی به افغانستان ته د استول کیدونکو بشري مرستو د لېږد او مستحقو خلکو ته د رسېدو په برخه کې له خیریه بنسټونو سره د همکارۍ ډاډ ورکړی.
د طالبانو په اعلاميه کې دا هم راغلي، چې د بهرنيو اتباعو په وتو کې به اسانتياوې برابرې کړي.
د طالبانو د پلاوي مشر او د بهرنيو چارو وزارت سرپرست امير خان متقي ويلي، چې طالبان به له نورو هېوادونو سره هم خپلې اړیکې ښې کړي.
د امريکا د بهرنيو چارو وزارت وياند ند پرايس بيا ويلي، چې دوی به د افغانستان په اړه خپل مخکينی دريځ خوندي ساتي.
امريکا له افغانستان څخه د ترهګرو په ګټه د نه استفادې، له دغه هېواد څخه د بهرنيو اتباعو په خوندي لېږد، دلته د بشري حقونو په تامين او په هراړخيزه توګه د ښځو او نجونو د رول په فعاله ساتلو ټينګار لري.
د امريکا په باور، له طالبانو سره خبرې د دوی د په رسميت پېژندلو په مانا نه دي.