تاند:( يکشنبه، د ميزان اتلسمه) د سعودي عربستان د استخباراتو پخواني رئيس ترکي الفيصل « د افغانستان دوسيه» په نوم کتاب لیکلی.
ويل شوي، چې دغه کتاب په عربي او انګليسي ژبو لیکل شوی.
تر اوسه د دې کتاب جزییات ډېر نه دي رسنيز شوي.
په کتاب کې ليکوال د طالبانو له بنسټګر او لومړني مشر ملا عمر سره د خپلې لېدنې کيسه هم کښلې ده.
الفيصل د طالبانو د پرځول شوې واکمنۍ په وروستيو کې کندهار ته تللی و، څو طالب مشران د القاعدې ډلې د مشر اسامه بن لادن سعودي عربستان ته وسپاري.
د سعودي د استخباراتو پخواني رئيس څو ورځې مخکې په یوه مرکه کې وويل، چې طالبانو هغه مهال کندهار ته د ده د سفر پر مهال ومنله ږ چې اسامه بن لادن به د هغه اصلي هېواد ( سعودي عربستان) ته سپاري، خو وروسته يې خپله دا ژمنه ماته کړه.
د سعودي د استخباراتو دغه پخواني رئيس دا هم وويل، چې طالبان اوس هم له القاعدې ډلې سره نيږدې اړيکې لري.
نوموړي له نړيوالې ټولنې غوښتي و، چې طالبان پر ژمنو د نه عمل او نړیوالو ترهګرو ډلو سره د اړيکو له کبله په رسميت ونه پيژني.
له دې سره سره ويل کيږي، چې د سعودي عربستان د استخباراتو د پخواني رئيس دغه کتاب به يوازې د طالبانو په اړه محدود نه شي.
ترکي الفيصل د پخواني شوروي خلاف د جنګیدونکو افغان مجاهدينو له مشرانو سره هم نيږدې اړيکې لرلې او سعودي د دغه جهاد له مطرحو ملاتړو څخه و.
ګومان کېږي، چې د ياد شوي جهاد او افغان مشرانو په اړه به یې هم د سعودي د استخباراتو د دغه پخواني مقام په کتاب کې ډېرې خبرې موجودې وي.