تاند:( جمعه، د ميزان شپاړسمه) د سمنګان ولايت په مرکز ایبک ښار کې پرون يوه ځوان د طالبانو د والي د دفتر مخکې ځانته اور اچولی دی.
د افغانستان اينډپينډيټ رسنۍ په حواله، دغه ځوان محمد ظريف نوميده.
ويل شوي، چې هغه په پرله پسې ډول طالبانو ته په شکايت ورغلی او د خپل ورور د قاتل نیولو غوښتنه يې کړې، خو طالبانو یې عرض نه دی اورېدلی.
د سیمې یو شمېر اوسیدونکو يادې رسنۍ ته ويلي، چې دغه ځوان پرله پسې عرض ته يې د طالبانو د نه پاملرنې له کبله بالآخره د طالبانو د والي د دفتر مخې ته راغلی او ځانته يې اور اچولی دی.
ويل شوي، چې د دغه ځوان مور او د طالبانو د والي ساتونکو د نوموړي د ممانعت هڅه کړې، خو په ژغورلو یې نه دي توانېدلي.
سرچينې نه ده روښانه کړې، چې د ياد شوي ځوان ورور څه کاره و، کله، په څه دلیل او څنګه چا وژلی او طالبانو يې ولې د ورور تورن قاتل نه نیوه؟
طالبانو هم د دغې پېښې په اړه څه نه دي ويلي.
د طالبانو له واکمنیدو سره، د هېواد له مختلفو سيمو څخه د ځوانانو د ځان وژنې خبرونه زيات شوي.
د نورو ډېرو ځان وژنو لوی دليل، د دغه عمل د سرته رسونکو شديد اقتصادي او بشري ناورين ګڼل شوی دی.