تاند(سې شنبه، د میزان ۱۳) د طالبانو د کورنیو چارو وزارت نن وویل چې په کابل کې یې د داعش یا اسلامي دولت د سختدریځې ډلې ۱۱ غړي نیولي دي.
د کورنیو چارووزارت ویندوی سعید خوستي وویل، طالبانو دا کسان پرون / دوشنبه د کابل ولایت په باغ داوود سیمه کې ونیول.
دا کسان وروسته له دې نیول شوي چې د یکشنبې په ورځ په کابل کې د عیدګاه جومات مخته په داسې حال کې بمي برید وشو چې په دغه جومات کې د طالبانو د ویندوی او د اطلاعاتو او کلتور د مرستیال ذبیح الله مجاهد د مور فاتحه وه.
ملګروملتو دا برید په کلکه غندلی دی خو له بلې خوا د احمد مسعود په مشرۍ د ملي مقاومت جبهې د دې برید مسوولیت په غاړه اخیستی دی.
له بلې خوا داعش ډلې په خپل تبلیغاتي ویبسایټ اعماق کې ویلي، د عیدګاه جومات مخې ته حمله چې پنځه کسان یې په نتیجه کې ووژل شول، د اسلامي دولت ډلې د یوه ځانمرګي بریدګر له خوا شوې ده.
په وروستیو ورځو کې د افغانستان په څو ولایتونو په تېره بیا ننګرهار او کابل کې بمي او انتحاري بریدونه زیات شوي دي.
طالبان په دغو بریدونو کې داعش په لاس لرلو تورنوي.