تاند:( جمعه، د میزان ۲مه) د امریکا متحده ایالاتو د بهرنیو چارو وزیر انتوني بلینکن د افغانستان په قضیه کې له ښکېلو مهمو هېوادونو سره د دغه هېواد په تړاو ګډ دریځ ته د رسیدو خبر ورکړی.
د ډیلي میل د راپور له مخې، هغه د پاکستان، چین، روسیې او نورو مهمو لوریو له استازو سره لیدلي او ویلي، چې طالبان د مشروعیت پيدا کیدو هڅې کوي، څو په بدل کې یې نړیوالې مرستې ترلاسه کړي.
د بلینکن په وینا، دوی او نور هېوادونه همغږي دي، چې طالبان دې له افغانستان څخه د القاعدې او نورو ترهګرو ډلو د فعالیت مخنیوی، د بشري حقونو تامین او نور نړیوال ارزښتونه تضمین کړي.
د دې ترڅنګ امریکایي وزیر له افغانستان څخه د بهرنیو اتباعو، د دوی د افغان همکارانو او خطر سره مخامخو کسانو په خوندي بهر کیدو ټینګار کړی.
پرون د طالبانو د بهرنیو چارو وزیر امیرخان متقي خبرداری ورکړ، چې که نړیوال ورسره په اړیکو کې ترینګلتیا ته دوام ورکړي، دا کار به د هغو کړیو په ګټه وي، چې ټولې نړۍ ته تاوان پېښولای شي.
امریکایي وزیر او نورو لوریو ښکاره نه دي ویلي، چې طالبان به په رسمیت وپېژني.
طالبانو هم د نړیوالو د شرطونو د پوره کولو لپاره په روښانه ټکیو ډاډ نه دی ورکړی.