تاند( چارشنبه، د سنبلې ۳۱ مه) پاکستاني چارواکو شکایت کړی، چې امریکا متحده ایالات د افغانستان په اړه ورسره همغږی دریځ مخته نه وړي.
د پاکستان د بهرنیو چارو وزیر شاه محمود قریشي د ملګرو ملتونو عمومي غونډې ته د وینا پرمهال ویلي، چې یاد شوی هېواد د دوی د غوښتنې برعکس د افغانستان کنګل شوې ۹،۵ میلیارده ډالره د اسعارو زېرمه له کنګله نه وباسي.
پاکستاني وزیر په ورته وخت کې خبرداری ورکړی، چې افغانستان به د منزوي ساتلو په صورت کې د نویمې لسیزې وضعیت ته ستون شي.
پاکستان هڅه کوله، چې امریکا او ملګري ملتونه د دغه نړیوال سازمان په سږنۍ کلنۍ غونډه کې د افغانستان په استازیتوب طالبانو ته د ګډون چانس ورکړي.
خو دا هېواد او دغه راز وسله وال طالبان ونه توانیدل، چې د ملګرو ملتونو په سږنۍ کلنۍ غونډه کې د ګډون او نړیوالو نه د رسمیت ترلاسه کولو چانس ترلاسه کړي.