تاند( یکشنبه، د سنبلې ۲۸مه) د ایران رسمي خبري اژانس ایرنا په یوه تحلیلي راپور کې پر امریکا متحده ایالاتو تور پورې کړی، چې په افغانستان کې د داعش او القاعدې ډلو د خطر له جدي ښودلو سره بیا پر دې هېواد د برید زمینه سازي ځانته کوي.
دغه خبري اژانس، چې د ایران د دولت رسمي نمایندګي کوي، په دغه تحلیلي راپور کې په دې اړه د یو شمېر افغان سیاسي څېرو او شنونکو نقل قولونه هم اخیستي.
سرچینې د عمر زاخېلوال په مشرۍ د افغانستان د نجات حرکت د مرستیال جعفر مهدوي او پخواني ولسمشر حامد کرزي ته د نیږدې شنونکي غلام جیلاني ځواک له څرګندونو استفاده کړې، چې د یادې وړاندوینې پخلی یې کړی.
شنونکو دغه خبري اژانس ته ویلي، چې امریکايي چارواکي خو یا په افغانستان کې القاعدې او نورو نړیوالو ترهګرو ډلو ته د ماتې ورکولو په اړه غلط غږیږي اویا خو یې د داعش او القاعدې د جدي ګڼلو په اړه څرګندونې ناسمې دي.
له افغانستان څخه د امریکایي ځواکونو له وتو او دلته د طالبانو له واکمنۍ سره په وروستیو ورځو کې پر طالبانو مرموز بریدونه هم پيل شوي.
دا بریدونه، چې څو پرله پسې هغه یې د داعش په اصلي مرکز(ننګرهار ولایت) کې شوي، مسوولیت یې کومې ډلې پرغاړه نه دی اخیستی او طالبانوهم نه دي ویلي، چې دا بریدونه د چا کار دی؟
امریکایي چارواکو مخکې خبرداری ورکړی و، چې که له افغانستان څخه د ترهګرۍ خطر جدي شي، دوی به یې پر وړاندې بې تفاوته او بې غبرګونه پاتې نه شي.
طالبانو د امریکایي چارواکو دا ډول څرګندونو ته کوم غبرګون نه دی ښودلی.
دغې ډلې د دوحې د سولې تړون کې امریکا ته ډاډ ورکړی و، چې د افغانستان خاوره به یې پرضد نه استعمالیږي.