تاند، دوشنبه، د ثور ۲۹مه: له امریکا، هند، کاناډا، پاکستان، ایران او ملګرو ملتونو وروسته ناټو سازمان هم د ولسمشرغني او عبدالله ترمنځ د سیاسي هوکړې هرکلی کړی دی.
د دغه سازمان مشر ینس سټولټنبرګ وايي، دا چې دواړو مشرانو د اختلاف د حل او د سولې د هڅو د بریالي کولو لپاره د یو ځای کېدو پرېکړه کړې ده، د ناټو لخوا یې هرکلی کېږي.
ښاغلي سټولټنبرګ ویلي، له دې وروستهله کورونا سره مبارزه، د تاوتریخوالي راکمول او د سولې لپاره کارتر هر څه مهم دي.
د ناټو لخوا په خپره شوې اعلامیه کې د سټولټنبرګ لخوا دا هم راغلي دي چې طالبان باید خپلو ژمنو باندې عمل وکړي، تاوتریخوالی راکم کړي او افغاني مذاکراتو کې په ګډون له خپلو هېوادوالو سره جوړ جاړی وکړي.
د ناټو مشر ټینګار کړی دی چې ټول لوري باید په افغانستان کې د سولې له فرصته ګټه واخلي: (( موږ لازمه بولو چې دسولې یو جامع تړون د افغانوښځو، وګړو قانون خوندیتوب لپاره وي او دا هیواد بیا د ترهګرو ځاله نشي.))
په خبرپاڼه کې د ناټو د سرمنشي له قوله دا هم راغلي چې یاد سازمان د دایمي امنیت او ثبات په برخه کې له افغانستان سره د قاطع روزنیز او مالي ملاتړ لپاره ژمن دی.
دا په داسې حال کې ده چې تېره ورځ یکشنبه د یوې هوکړې له مخې ښاغلی عبدالله د ولسمشر غني لخوا د مصالحې شورا رئیس وټاکل شو.