تاند ( یکشنبه، د سنبلې ۲۱) د پرتګال فوټبال لوبډلې مخکښ لوبغاړی کریسټیانو رونالډو دولس کاله وروسته یو ځل بیا له مانچسټر یونایټېډ لوبډلې سره یوځای شو.
نوموړی لوبډلې ته په راتګ سره د مانچسټر لپاره یو ګول وواهه.
نوموړی دا ګول د نیوکاسل یونایټیډ لوبډلې پر وړاندې د لومړۍ نیمایي په وروستیو شېبو کې په داسې حال کې وواهه، چې د مخالفې لوبډلې ګول کیپر غلطي وکړه او رونالډو ترې بشپړه ګټه پورته کړه.
د رونالډو دې ګول د دې کلب ټول لوبغاړي سخت خوشحاله کړل.
په ټولنیزو رسنیو کې د رونالډو د دې شېبې انځورونه لاس په لاس کېږي او مینه وال يې هم سخت خوښ دي.
نوموړی د نړۍ په کچه د فوټبال په ډګر کې زیات مینه وال لري او هره مثبته کړنه یې په نړیواله کچه ستایل کېږي.