تاند ( شنبه د سنبلې ۶ مه) ترکیه وایي چې د خپلو امنیتي ځواکونو له حضور پرته به د کابل د هوایي ډګر د چارو په سمبالولو کې ونډه وانخلي.
رویټرز خبري آژانس د یوې سرچینې له قوله لیکلي دي چې ترکیې دغه خبره د کابل په هوایي ډګر کې له خونړي برید او په کابل کې د ورته بریدونو د خطرونو له زیاتېدو وروسته کړی ده.
طالبانو له ترکیې غوښتي وو چې د کابل د هوایي ډګر د تخنیکي چارو په برخه کې ورسره مرسته وکړي، خو له افغانستان د بهرنیو ځواکونو وتلو شرایط بدل کړي دي.
ترک سرتېرو چې د ناټو ځواکونو په اډانه کې فعالیت کوي، له شپږو کلونو راهیسې د کابل د هوایي ډګر د امنيت ساتنې مسوولیت پرغاړه درلود.
طالبان غواړي چې د اګست میاشتې تر ۳۱ نیټې د ترکیې د ځواکونو په ګډون ټول بهرني ځواکونه له افغانستانه ووځي.
د کابل هوایي ډګر له نړۍ سره د اړیکو د ساتلو، د مرستو د ترلاسه کولو او ورته نورو چارو په برخه خورا مهم بلل کیږي.
د کابل په هوایي ډګرکې د پنجشنبې ورځې له برید وروسته د ترکیې یوه جګپوړي چارواکي وویل چې د کابل د هوایي ډګر او د هغه د کارکوونکو د امنیت ساتلو په برخه کې د طالبانو پر وړتیاوو شکونه زیات شوي دی.
دغه چارواکي چې نه یې غوښتل نوم یې واخیستل شي، وویل چې ترکیه غواړي د کابل هوایي ډګر امنیت د ترک سرتېرو په ګډون د یوې ځانګړې امنیتي ډلې په مټ وساتي.
بل خوا د ترکیې ولسمشر رجب طیب اردوغان د جمعې په ورځ خبریالانو ته وویل چې شته ګواښونونو ته په پام سره تر اوسه دغه هېواد د کابل د هوایي ډګر د چارو د سمبالولو په برخه کې کومه پرېکړه نه ده کړې.