تاند (دوشنبه د سنبلې ۲) د امریکا ولسمشر جو بایډن په افغانستان کې د تخلیې ماموریت د غځولو په لټه کې دی.
د امریکایي رسنیو د راپورونو له مخې د سپينې ماڼۍ یوه لوړپوړي چارواکي ویلي چې بایډن به په راتلونکو ۲۴ ساعتونو کې له افغانستان څخه د امریکايي وګړو د تخلیې ماموریت د غځولو په هکله خپله پرېکړه اعلان کړي.
د دغه چارواکي په وینا چې په افغانستان کې لا هم سلګونه وګړي حضور لري او دوی اړ دي چې دغه ماموریت وغځوي.
بلې خوا د امریکا د ملي امنیت سلاکار هم له رسنیو سره په خبرو کې ویلي چې له طالبانو سره په اړیکه کې دي او په خبرو کې د پام وړ پرمختګ شته، نو له همدې امله ښایي د تخلیې ماموریت د امریکایي ځواکونو له لوري ادامه ولري.
خو طالبانو تر دې وړاندې ویلي چې په هېڅ صورت د اګسټ تر یو دېرشمې نېټې وروسته امریکایانو ته په افغانستان کې د حضور اجازه نه ورکوي.