تاند (شنبه د اسد ۳۰مه) د پاکستان د تحریک طالبان یو مشر مولوي فقیر محمد په افغانستان کې د طالبانو پر بریالي کېدو خوښي ښودلې ده.

فقیر محمد له څو کلن زندانه تر خوشې کېدو وروسته خپلو پلویانو ته لومړنۍ وینا کې ویلي، دا انصاف نه دی چې په افغانستان کې د طالبانو له لوري د رامنځته شوي شرعي نظام پلوي کوي، خو په پاکستان کې دې نامسلمانه رژیم حاکم وي.

هغه خپلو جنګیالیو ته په وینا کې ویلي، اوس وخت دی چې په پاکستان کې د کفري نظام د بدلون لپاره خپل ټول قوت وکاروي.

د څو ګونو مذهبي ډلو ټولګه (تحریک طالبان ) له ۲۰۰۶ راهیسې پاکستان کې د شریعت د نفاذ پر ادعا وسله وال فعالیت کوي.

د ویلو ده چې تر دې وړاندې هم د دغه تحریک یو بل مشر له سي ان ان سره په مرکه کې د پاکستاني ادارو پر ضد د جګړې خبرداری ورکړی و او زیاته کړې یې وه چې د پښتنو د خاورې تر ازادۍ پورې به خپلې وسله والې مبارزې ته دوام ورکړي.