تاند ( شنبه، د اسد ۱۶) د ملګرو ملتونو د بشري حقونو ادارې په افغانستان کې پر روان تاوتریخوالي اندېښنه ښودلې ده.
د یادې ادارې مشرې میشل بشلت د جګړې له ښکېلو خواوو غوښتي، چې بشري جنایت ودروي او د سولې د خبرو له لارې په دغه هېواد کې روانه جګړه پای ته ورسوي.
آغلې مېشل وایي د ملګرو ملتونو د بشري حقونو اداره په افغانستان کې د بشري حقونو د نقض په مستندولو بوخته ده او هڅه کوي د ښکېلو لورو هغه موارد په ګوته کړي، چې بشر ضد جنایت بلل کېږي.
نوموړې زیاته کړې چې ملګري ملتونه په تېره د بشري حقونو عالي کمېشنري په افغانستان کې د تاوتریخوالي د کمولو په لټه کې ده او د بشر ضد جنایتونو د ترسره کوونکو د محاکمې ژمنه کوي.
دا په داسې حال کې ده، چې وړمه ورځ د افغانستان د بهرنیو چارو وزارت هم په یوه خبرپاڼه کې پر بشري حقونو د څار د نړیوالې ډلې د راپور هرکلی کړی وو او د دې غوښتنه یې کړې وه، چې نړیوال بنسټونه دې په افغانستان کې د بشري حقونو د نقض اسناد راټول کړي او شوې ادعاوې مستندې کړي.
یاد وزارت ویلي وو، چې نړیوال بنسټونه باید په افغانستان کې د طالبانو پر وروستیو کړنو سترګې پټې نه کړي او په اړه دې مستند راپورونه نړیوالو ته وړاندې کړي.
په دې وروستیو کې د بشري حقونو په برخه کې فعال بنسټونه وایي چې د طالبانو تر نفوذ لاندې سیمو کې ملکي وګړي وژل شوي، بشري حقونه نقض کېږي او په جګړو کې یې عامو خلکو ته زیانونه اوړي.