تاند (يکشنبه د اسد ۱۰مه ) امريکا متحده ايالتونه د هوا له لارې د افغانستان د صادراتو د زياتېدو پر پلان کارکوي.
د افغانستان د بيارغاونې لپاره د امريکا د ځانګړي پلټونکي دفتر (سيګار) په خپل تازه ر اپور کې وايي چې امريکا د هوا له لارې د افغانستان د صادراتو د زياتېدو پر پلان کار کوي.
د ددغه راپور له مخې دغه پلان له 2021 تر 2025 ميلادي کال پورې د څلورو کلونو لپاره په پام کې نيول شوی دی چې پر بنسټ به يې د افغانستان هوايي صادرات تر ديرش سلنې پورې زيات شي.
امريکا متحده ايالتونه د افغانستان د کابل، کندهار، مزار شريف ،جلال آباد او هرات د هوايي ډګرونو د بيارغاونې په برخه کې له افغاستان سره مرسته کوي چې دا چاره به د دوه زره کاري فرصتونو د برابرېدو لامل شي.
د پلان له مخې د سيمې هېوادونو ته به د توکو د صادراتو لپاره تر ټولو ډيره پانګونه د حامد کرزي پر هوايي ډګر وشي.
دهوايي دهليزونو د فعاليت له پېلېدو راهيسی افغان دولت په دې برخه کې شاواخوا يو اعشاريه پنځه ميليارده افغانۍ لګولي دي او په دې موده کې د 170 ميليون ډالرو په ارزښت د هېواد سوداګريز توکي صادر شوي دي.
په دې وروستيو کې د امنيتي ننګونو له امله د افغانستان صادرات خورا کم شوي دي. تاجيکستان اعلان کړی دی چې په تېرو دوو مياشتو کې د دواړو هېوادونو ترمنځ سوداګري د پاموړ کمه شوې ده.
د تاجيکستان د ګمرک رييس خورشید کريم زاده په يوه خبري غونډه کې وويل چې له جنوري تر فبروري مياشتې پورې په ورځ تر 50زياتې لارۍ له پولې اوښتې ، خو اوسمهال په ورځ کی له دوه تر درېيو لارۍ تيرېږي.
د تاجيکستان د چارواکو په وينا تېرکال د افغانستان او تاجيکستان تر منځ د سوداګرۍ ارزښت 70.7 ډالره و، چې 69.8 ميليونه ډالره يې افغانستان ته د دغه هېواد صادرات وو او افغانستان بيا تاجيکستان ته يوازې 900.000ډالره صادرات لرل.