تاند ( شنبه، د اسد۹) د ننګرهار ولایت چارواکي وایي، چې افغان ځواکونو د دې ولایت په سپين غر او اچين ولسوالیوکې د ۴ پاکستانيانو په ګډون ۱۹ وسله والو طالبانو ته مرګ ژوبله واړوله.
د والي ویاند عطاءالله خوږیاڼی وایي، چې دا پېښې د یادو ولسوالیو په باغدرې، نرګوسۍ، مامند درې او وچ کوټ سيمو کې تېره شپه رامنځته شوې دي.
نوموړی وایي د افغان ځواکونو په دې عملیاتو کې د درې پاکستانيانو په ګډون ۱۰ تنه ووژل شوی او په خبره یې د عمر افريدي په نوم د يو پاکستاني په ګډون ۹ نور ټپيان شول.
د والي ویاند عطاالله خوږیاڼی زیاتوي، چې په دې نښتو کې د سيمه ييزې اردو دوه سرتيري هم ټپيان شوي دي.
بل لورته وسله والو طالبانو تر اوسه په دې تړاو څه نه دي ویلي.