تاند (جمعه، د اسد ۸) روسي چارواکي وايي، د دې احتمال ډېر لېرې دی چې طالبان دې په افغانستان کې واک ترلاسه کړای شي.
د تاس خبري اژانس د راپور له مخې، په ملګروملتو کې د روسیې د دایمي استازي لومړي مرستیال دیمیتري پولیانسکي پرون /پنجشنبه په نیویارک کې یوې خبري غونډې ته وویل«د اوس وخت لپاره دا خورا لېرې احتمال دی چې طالبان به په زور واک ترلاسه کوي او موږ هیله لرو چې د ملي روغې جوړې پروسه به پیلېږي چې په نتیجه کې به یې د ملي تړون حکومت جوړ شي او موږ ډېر لېواله یوو چې له نورو لارو، په ځانګړي ډول د ترویکا له چوکاټ څخه په دې طرحې کې ونډه واخلو. د ترویکا غونډه به فکر کوم ژر په دوحه کې جوړه شي.»
د افغانستان لپاره د روسیې ځانګړی استازی ضمیر کابلوف هم پرون / پنجشنبه دا احتمال چې طالبان به ټول افغانستان ونیسي ډېر لږ وباله.
کابلوف وویل، فکر نه کوي چې طالبان دې افغانستان ونیولی شي.