تاند (چهارشنبه، د اسد ۶) افغان کرکټ بورډ په کابل کې د د دوو اونيو لپاره له ۱۹ کلنو څخه د کم عمره لوبغاړو روزنيز کمپ پیل کړ.
کرکټ بورډ په یوه خبرپاڼه کې ویلي، چې نن په کابل کې د ۲۶ لوبغاړو په ګډون رونيز کمپ پيل شو، چې د اګسټ تر نهمې نېټې پورې به دوام وکړي.
د خبرپاڼې په حواله ياد روزنيز کمپ د بنګله دېش پر وړاندې سياليو او د ۱۹ کلنو څخه د کم عمره ځوانانو نړيوال جام ته د چمتووالي په موخه ترسره کېږي.
سرچینه وایي، چې ياد کمپ ته لوبغاړي د يو ـ يو ټېسټ نه تر بریالي کېدو وروسته او په تېروو دوو کلونو کې د دوی کارکردګۍ ته په کتو انتخاب شوي دي.
ټاکل شوې ، چې د ۱۹ کلنو څخه د کم عمره ځوانانو افغان لوبډله له بنګله دېش لوبډلې سره پنځه يو ورځنۍ او يوه څلور ورځنۍ سيالۍ ترسره کړي او دغه د روان ميلادي کال په وروستۍ مياشت کې د ۱۹ کلنو څخه د کم عمره ځوانانو په نړيوال جام کې ګډون وکړي.