تاند ( چهارشنبه، د اسد ۶) امریکايي پوځ په تېره یوه اونۍ کې د افغان ځواکونو په ملاتړ او د وسله والو طالبانو پر ضد ګڼ هوایي بریدونه کړي.
دا څرګندونې د پنټاګون ویاند رابرت لودویک تازه خبریالانو ته کړې.
دا څرګندونې داسې مهال کېږي، چې په تېرو شپږو اونیو کې د افغان پوځ په ملاتړ د امریکا هوایي بریدونه ناڅاپي زیات شوي.
رابرت لودویک که څه هم نور جزیات نه دي ورکړي، خو دومره یې ویلي، چې دا بریدونه د عادي او هم د بې پیلوټه الوتکو په وسیله شوي دي.
په ورته وخت کې یوه بل امریکایي چارواکي د نوم نه ښودلو په شرط رسنیو ته ویلي، چې د جولای له ۲۰ مې را پدیخوا د افغان پوځ په ملاتړ د امریکایي پوځیانو هوایي بریدونو زور اخیستی دی.
د سرچینې په خبره دا بریدونه د افغانستان په بېلابېلو سیمو کې شوي خو زیاتوي ډېر تمرکز یې د کندهار پر شاوخوا و.
د دې هوایي بریدونو زیاتوالی ښيي، چې له افغانستان څخه د نړیوالو ځواکونو د پوره وتلو په درشل کې او د جګړې په ډګر کې د طالبانو له پرمختګونو وروسته د متحدوایالتونو پوځ د افغان ځواکونو هوايي ملاتړ پیاوړی کړی دی.
تېره یک شنبه هم په منځني ختیځ کې د امریکا د پوځ د مرکزي قرارګاه عمومي قوماندان جنرال کینت مککینزي ویلي وو، که طالبان خپلو بریدونو ته زور ورکړي نو دوی به د افغان ځواکونو هوایي ملاتړ ته دوام ورکړي.
د امریکا د پوځ د مرکزي قرارګاه مسوولان وايي، له افغانستان څخه د امریکايي ځواکونو د وتلو بهیر په سلو کې څه باندې ۹۵ بشپړ شوی دی.
دو وایي تمه ده چې دا ځواکونه د را روانې اګست میاشتې په ۳۱ مه نېټه په بشپړ ډول له افغانستانه ووځي.
امریکا داسې مهال د افغان پوځ هوایي ملاتړ ته دوام ورکوي، چې تازه راپورونه وايي، وسله والو طالبانو په افغانستان کې د تاجکستان انصارالله ډلې ته هم د فعالیت زمينه برابره کړې ده.
عيني شاهدانو رسنیو ته ویلي، کله چې وسله والو طالبانو تېره مياشت د بدخشان ځينې سيمې ونيولې نو دغې ډلې هلته ته د طالبانو بيرغ پورته کړ.
ويل کېږي د انصارالله ډله اوسمهال د بدخشان پرپوله پر پنځو ولسواليو کنټرول لري.
د افغانستان پر پوله د یوې سقوط شوې سیمې یوه اوسېدونکي رسنیو ته ویلي، د مهدي ارسلان په نوم په تاجکستان کې یوه زېږېدلي وګړي پر سرحدي پوسته د طالبانو بیرغ پورته کړی دی.
د راپور له مخې د تاجکستان دغه بنسټپال وسله وال د بدخشان ولایت په کوفاب، شِکی، نِسَی، مایمَی او خواهان کې حضور لري.