تاند(چهارشنبه، اسد6) – پاکستانۍ ډان ورځپاڼه وايي، وسله والو طالبانو د سپين بولدک ولسوالۍ تر نيولو څه موده وروسته اوس د مالیې راټولولو لپاره نوې تعرفې ورکول پيل کړي دي.
پاکستان تېره ورځ د سپين بولدک د بندر پرانستلو وروسته طالبانو د مالیې په راټولولو لاس پورې کړى دى.
دغه بندر څه موده مخکې هغه مهال وتړل شو چې وسله والو طالبانو دغه بندر ونيوه.
تېره ورځ په افغانستان کې د پاکستان سفارت هم ويلي و چې ياد بندر د ټرانزیټ لپاره بېره پرانېستل شوى دى.
ډان ورځپاڼه زیاتوي، پاکستان وروسته له هغې ياد بندر پرانيست چې طالب مشرانو خپلو کې پرې مشوره کړې وه.
ورځپاڼه دغه راز وايي، طالبانو د تلونکو او راتلونکو موټرو څخه ماليه راټولوي.
خو افغان چارواکو تراوسه په دې اړه څه نه دي ویلي.