تاند( سه شنبه اسد5) امريکا د افغانستان پر فضا د الوتنو لپاره پر خپلو الوتکو محدوديتونه لګولي دي.
د امريکا متحده ايالتونو دهوايي چلند فډرالي ادارې نن په يوه بيړني امر کې اعلان وکړ چې دامنيتي شرايطو بدلون ته يې په پام سره د افغانستان پر فضا د امريکا د الوتکو د الوتنې لپاره نوې محدوديتونه ټاکلي دي.
د امربکا د هوايي چلند ادارې سپارښتنه کړې ده چې له هغو الوتکو پرته چې د حامد کرزي له هوايي ډګره فعاليت کوي نورو امريکايي الوتکو ته تر ۲۶زره فوټه (څه باندې ۷۹۰۰مټره) د ټيټو الوتنو اجازه نشته.
دغه محدوديتونه د امريکا دپوځ پر هغو الوتکو نه پلي کيږي چې په افغانستان کې عمليات کوي.
امريکا په داسې حال کې پر خپلو الوتکو دغه محدوديتونه لګوي چې تر دې وړاندې يې د خپلو ځواکونو تر اېستلو وروسته په افغانستان کې د يوه نړيوال هوايي ډګر فعاليت اړين بللی دی.
امريکا په دې برخه دکابل د هوايي ډګر د امنيت ساتلو په برخه کې له ترکيې سره هوکړې ته رسيدلې، افغان حکومت هم دترکي ځواکونو له لوري د حامدکرزي د نړيوال هوايي ډګر د امنيت ساتلو هرکلی کړی.
خو طالبانو دترکيې دغه کار د اشغال دوام بللی دی او ويلي يې دي چې په افغانستان کې د هېڅ بل هېواد د ځواکونو پاتې کېدل ورته د منلو وړ نه دي، پر دې مساله د ترکيې او طالبانو مخالفت تر دې بريده ورسيد چې څو ورځې وړاندې د ترکيې ولسمشر رجب طیب اردوغان په خپله طالبان هغه اشغالګر وبلل چې په وينايی د خپلو وروڼو خاوره لاندې کوي