تاند (سې شنبه، د اسد۵) د امنیت شورا لپاره د ملګروملتو په یوه ترتیب شوي راپور کې ویل شوي چې د پاکستاني طالبانو تحریک له افغان طالبانو سره اړیکې ټینګې ساتلي او د دې ډلې نژدې ۶ زره ترهګر د افغانستان په خاوره کې دي.
د پاکستان د ډان ورځپاڼې د راپور له مخې، د ملګروملتو د شننو د ملاتړ او د بندیزونو د څارنې ډلې په خپل ۲۸ نمبر راپور کې ویلي، د بېلابېلو هیوادونو او مختلفو سختدریځو ډلو ترهګر په افغانستان کې په جګړه بوخت دي.
د م.م. د بندیزونو د څارنې ډلې په خپل راپور کې اټکل کړی چې په افغانستان کې د بهرنیو ترهګرو شمېر په تقریبي ډول د ۸۰۰۰ او ۱۰۰۰۰ ترمنځ دی.
د دې راپور له مخې، د دغو ترهګرو په منځ کې د منځنۍ اسیا، شمالي قفقاز، روسیې، پاکستان او د چین د شین جین (ایغور) د کورواک ایالت وګړي شامل دي.
د ملګروملتو په راپور کې همداراز راغلي، د پاکستاني طالبانو د تحریک جګړه مار ډیورند کرښې ته څېرمه د ننګرهار ولایت په ختیځو ولسوالیو کې مېشت دي.
په راپور کې دا یادونه هم شوې چې افغان طالبانو د پاکستاني طالبانو له هغو غړیو سره په ځینو وختونو کې جګړې کړي چې داعش یا د اسلامي دولت د خراسان څانګې ته اوښتي دي.
خو د ملګروملتو د څارونکو راپور وايي چې له ځینو اختلافاتو سره سره د پاکستاني طالبانو تحریک او افغان طالبان د پخوا په شان اړیکې پالي او دا ډله په جګړه کې د افغان طالبانو ملاتړ کوي.
دې راپور له شهریار مسعود، جمعیت الحرار، حزب الاحرار، امجد فاروقي او عثمان سیف الله (چې په لشکر جهنګوي هم مشهوره ده) ډلو سره د افغان او پاکستاني طالبانو د اړیکو یادونه هم کړې ده او ویلي یې دي چې د ۲۰۱۹ د اګست او ۲۰۲۰ کلونو ترمنځ د دوی ترمنځ همغږي ډېره شوې ده.
د القاعده په اړه په راپور کې راغلي چې د دغو ډلو ترمنځ د همغږۍ او یووالي د راوستلو رول لري.
د ملګروملتو راپور د افغانستان په جګړه کې له وروستیو انکشافاتو مخکې جوړ شوی. ګڼ افغان چارواکي او استخباراتي سرچینې وايي، په وروستیو دوو میاشتو کې شاوخوا ۱۵ زره پاکستاني جګړه مار د افغانستان جګړې ته راغلي دي.
د افغانستان د ملي امنیت پخواني رييس رحمت الله نبیل ویلي چې هره ورځ زر تنه جګړه مار د سپین بولدک له بندري لارې افغانستان ته راځي.