تاند(سهشنبه، اسد5) – د افغانستان د ولسمشر د دوهم مرستيال مطبوعاتي دفتر په يوه مطبوعاتي اعلامیه کې د طالبانو د دوو مهم غړيو اړوند عکسونه او اعترافات خپاره کړي دي.
ياد دفتر تاند ته په رالېږلې مطبوعاتي اعلامیه کې ویلي، چې نيول شوي دوه کسان د آغا محمد او سميع الله په نومونو دي چې د دولتي کارکونکو په وژلو او بمي چاودنو کې لاس لري.
د طالبانو نيول شوى غړي آغا محمد وايي: “د اختطاف په جرم 12 کاله بندي وم او په ١٣٩٩ کې خوشې شوم او هلته قاري فيض الله سره بلد شوم. د خوشې کېدو وروسته او اته میاشتې وروسته هغه راسره اړيکه ونيوله چې په تخار کې د امنيې قوماندانۍ افسر تاج محمد ووژنو. تاج محمد د قاري فيض الله په بندي کولو کې ښکېل وو. کله مو چې د تاج محمد د وژلو لپاره د موټر سایکل ډک چاودېدونکي توکي برابر کړل نو د ملي امنیت ځواکونو له لوري ونیول شوم.”
دغه راز د يو بل نيول شوي طالب سميع الله ويلي:” دوه کاله وړاندې د مولوي کبير په مشرۍ د طالبانو يوه غړي احساس د طالبانو ډلې غړيتوب ته دعوت کړم. وروسته له کاکا زامنو هر يو نورالدین او ضمیر سره د لوګر بره کي برک ته وغوښتل شو. هلته مو څلور ورځې روزنه ترلاسه کړه او په څلورو چاودونو کې ښکېل يم. نږدې يوه کال مخکې د ١٦ مې ناحيې اړوند قلعه احمد خان کې مو د پولیسو يو رينجر موټر ته چاودنه ورکړه. شپږ میاشتې وړاندې مو د کارته نو سيمه کې مو رينجر کې چاودېدونکي توکي ځاى پر ځاى کړل او چاودنه مو ورکړه. دوه مياشتې وړاندې مو په بګراميو کې د سړک په غاړه ماين ځاى پر ځاى کړ چې په کې د ملي اردو دوه منسوبین ووژل شول. کال مخکې مو اتمه ناحيه کې د پولیسو رينجر کې ماين کېښود او د کاکا زوى مې نورالدین د دولتي کارکونکو د وژنې په هدف شپږ ماينونو ته چاودنه ورکړې ده.”
د ولسمشر د دوهم مرستيال مطبوعاتي دفتر وايي، په قاطع توګه د امنیتي تړون او د شپږ نيمو بجو د غونډو په چوکاټ کې د جنايتکارانو او ترهګرۍ پر ضد مبارزه دوام لري.
BARYALI AW ZHWANDEE DEE WEE AFGHAN FAUZ.