تاند ( سه شنبه، د اسد ۵) د توکیو ۲۰۲۰ المپیک لوبې په داسې حال کې دوام لري، چې ورځ تر بلې پر کورونا د اخته کسانو شمېر زیاتېږي.
د یادو لوبو مسوولانو تېره ورځ وویل، چې تر دې دمه ۱۵ تنه چې د المپيک لوبو پورې تړاو لري پر کورونا ناروغۍ اخته شوي دي.
د دوی په خبره په اخته کسانو کې ۳ لوبغاړي هم شامل دي.
سرچینې زیاتوي، چې یاد لوبغاړي تازه توکیو ته رسېدلي وو او پر کورونا اخته شوي دي.
د وروستیو معلوماتو له مخې په یادو لوبو کې د جولا له لومړۍ نېټې تر دې دمه پر کورونا ۱۴۸ تنه اخته شوي دي.
د یادونې ده، چې د هند سوداګریز لیګ هم د کورونا د خپرېدو له وېرې ځنډېدلی او ټاکل شوې، چې په نږدې راتلونکي کې پيل شي.