تاند(سې شنبه، د اسد ۵) د جاپان د المپیک په سیالیو کې د تکوندو افغان لوبغاړی فرزاد منصوري نن له خپل کوریایي سیال “ان کیو دون“ سره مخامخ کېږي.
د المپیک ملي کمیټې مطبوعاتي غړي مجیب قاریزاده وايي چې ١٩ کلن فرزاد منصوري، چې ١٩٥ سانتي ونه لري، مخکې د کوریا، اردن، او هندستان په نړېوالو سیالیو د سرو زرو څو مډالونه ګټلي دي.
نوموړي وویل چې ښاغلی منصوري همدارنګه د چین او اماراتو په ازادو سیالیو کې دویم مقام ګټلی.
له اسیایي سیالیو د سپینو زرو مډال او د بیروت له نړېوالو لوبو د ژېوړ مډال د تکوندو د دغه لوبغاړي له نورو لاسته راوړنو څخه دي.
د نوموړي کوریایي سیال چې نن ورسره مخامخ کیږي 29 کاله عمر او 190 سانتي قد لري او دوه ځلې یې د اسیايي سیالیو اتلولي خپله کړې ده.
د المپیک نړېوالۍ سیالۍ د جمعې په ورځ د جاپان په توکیو کې پیل شوې او د ۲۰۴ هیوادونو ١١ زره لوبغاړي پکې برخه لري.