تاند (پنج شنبه، د سرطان ۳۱) د ننګرهار ولایت چارواکي وایي، د دې ولایت په اچين ولسوالۍ سره کمر سيمه کې تېر ماښام وسله والو طالبانو د هاوان دوه مرمۍ توغولي او د ملکي وګړو پر کورونو لګېدلي.
د والي ویاند عطاالله خوږیاڼی وایي په دې پېښه کې پنځه ماشومان وژل شوي او دوه نور ټپيان دي.
خوږیاڼی وایي وژل شوي ماشومان د یوې کورنۍ غړي دي.
بل لورته وسله والو طالبانو تر اوسه په دې تړاو څه نه دي ویلي.
دا پېښه داسې مهال کېږي، چې ولسمشر غني نن د دې ولایت د عمومي امنیتي وضعیت د ارزونې په موخه دې ولایت ته راغلی وو.
د یادونې ده، چې تېره ورځ هم د دې ولایت خوږیاڼو ولسوالۍ په چمتلې سیمه کې د ملکي وګړو پر موټر مقناطیسي ماین چاودنه کې ۶ تنه ووژل شول او دوه نور ټپیان شول.