تاند ( چهارشنبه، د سرطان ۳۰) د افغانستان د امنیت شورا انګلستان ته د دې شورا د مشر حمدالله محب د سفر خبر ورکوي.
د یادې شورا پر ټویټرپاڼه لیکل شوي، چې نوموړی نن سهار مهال د یو رسمي سفر پر مهال انګلستان ته روان شو.
سرچینه زیاتوي، محب به د دغه سفر پر مهال د انګلستان له امنیتي او سیاسي مشرانو سره د افغانستان او دغه هېواد تر منځ پر دوه اړخیزو اړیکو بحث او خبرې وکړي.
تر دې وړاندې هم د امنیت شورا سلاکار یو شمېر هېوادونو ته ورته سفرونه درلودل.
دا سفر داسې مهال ترسره کېږي، چې په افغانستان کې امنیتي حالت د خرابېدو په حال کې دی او ګڼ شمېر سیمې د افغان حکومت او طالبانو تر منځ لاس په لاس شوې دي.
افغان حکومت بیا په نېږدي راتلونکي کې د امنیتي حالت ښه کېدو او بدلون خبر ورکوي.