تاند ( دوشنبه د سرطان ۲۸) د پاکستان او انګلستان ترمنځ دوهمه شل اوره لوبه تېره شپه انګلستانۍ لوبډلې وګټله او د لومړۍ لوبې غچ یې واخیست.
پاکستان پچه وګټله او لومړی یې انګلستان ته د توپوهنې بلنه ورکړه.
انګلستان په ټاکل شویو ۲۰ اورونو کې د ټولو لوبغاړو په سوځېدو ۲۰۰ منډې وکړې.
جاس بټلر ۵۹، لیام لیوینګسټون ۳۸ او معین علي ۳۶ منډې وکړې.
د پاکستان له خوا محمد حسنین ۳، عماد وسیم، حارث روف ۲-۲ لوبغاړي وسوځول.
پاکستان په ټاکلو ۲۰ اورونو کې د ۹ لوبغاړو په سوځېدو ۱۵۵ منډې وکړې او د ۴۵ منډو په توپیر یې لوبه وبایلله.
د دوی لپاره محمد رضوان ۳۷، شاداب خان ۳۶ ناسوځېدلې او بابر اعظم ۲۲ منډې وکړې.
انګلستان لپاره بیا ثاقب محمود ۳، معین علي او عادل رشید ۲-۲ لوبغاړي وسوځول.
ټاکل شوې ده، چې د دواړو لوبډلو ترمنځ ۳ یمه شل اوره لوبه د جولای په ۲۰مه نېټه ترسره شي.
له دې وړاندې انګلستان له پاکستان نه په پرلپسې ډول ۳ پنځوس اورمه لوبې هم ګټلې وې.