تاند (چهارشنبه د سرطان ۲۳) په افغانستان کې د ملګرو ملتونو سیاسي استازوالۍ یا یوناما د راتلونکي لوی اختر په مناسبت په دغه هیواد کې د اوربند ټینګېدو غوښتنه کړې ده.
یوناما نن چهارشنبه له افغان حکومت او وسله والو طالبانو غوښتي چې د اختر په ورځو کې اوربند اعلان کړي تر څو دا کار له دوامداره او معنا لرونکو خبرو اترو سره مرسته وکړي.
دغه سازمان ټینګار کړی چې ملکي وګړو ته د زیان نه رسېدو تر ټولو غوره لار د سولې خبرو ته بیا راګرځېدل دي او هغوی چې د افغانستان او افغانانو ښې راتلونکې ته لېواله دي باید د سولې خبرو ته لومړیتوب ورکړي.
په همدې حال کې د افغانستان د وسله والو پوځ ویاند جنرال عمر شینواري نن چهارشنبه په کابل کې د یوې خبري ناستې پر مهال وویل چې افغان حکومت هر وخت د اوربند غوښتونکی دی.
د ښاغلي عمر په خبره د اوربند ټینګېدو په هکله هغه شرایط چې د حکومت مشران یې لري، لېواله دي او په خبره یې چې دا د افغانانو غوښتنه ده.
ملګرو ملتونه په خپل ننني بیان کې په افغانستان کې د بشري حقونو د سرغړونو او پر هغو خلکو د تاوتریخوالي د ادعاوو په هکله چې د روانو جګړو له امله په ټول هېواد کې اغېزمن شوي اندېښنه څرګنده کړې ده.
ملګري ملتونو د جګړې ښکېلې خواوې مکلفې بللي چې د افغانانو عزت او بشري حقونو ته درناوی وکړي.
ملګري ملتونه داسې مهال په افغانستان کې د لوی اختر په مناسبت د اوربند غوښتنه کوي چې په وروستیو څو اونیو کې د افغانستان له ګوټ ګوټ څخه هره ورځ د افغان ځواکونو او وسله والو طالبانو تر منځ د جګړو له امله د سختې مرګ ژوبلې راپورونه ورکول کېږي.
همدارنګه په هغو سیمو کې چې جګړې روانې دي زرګونه کورنۍ له خپلو مېنو بې ځایه شوي چې لومړنیو مرستو ته اړتیا لري.