تاند (دوشنبه د سرطان ۲۱) په هلمند کې د ماین چاودنې دولسو ملکي وګړو ته مرګ ژوبله اړولې ده.
له هلمند څخه راپورونه وايي چې دغه پېښه نن سهار د لښکرګاه په بولان سیمه کې هغه مهال رامنځته شوه چې یو ټونس ډوله موټر د سړک غاړې ته پر ځای پر ځای شوي ماین ور برابر شو.
د لومړنیو معلوماتو له مخې په دې چاودنه کې څلور کسه وژل شوي او اته نور ټپيان دي.
د یو بل خبر له مخې نن شاوخوا لس نیمې بجې پکتیا کې د جنایي جرمونو پر وړاندې د مبارزې په کارمندانو چاودنه شوې ده.
د پکتیا ولایت د امنیه قوماندانۍ ویاند حیات الله نظامي احمدزي رسنیو ته ویلي چې چاودنه د ګردېز ښار ددویمې امنیتي حوزې اړوند د ترافیکو د مدیریت ته څېرمه شوې چې یو جنایي کارکوونکی په کې وژل شوی دی.
تر اوسه د دغو پېښو په هکله کوم چا یا ډلې څه نه دي ویلي.