تاند ( یک شنبه، د سرطان ۲۰) د افغانستان د برېښنا شرکت مسوولان وايي، چې نن سهار په پروان ولایت کې د وارداتي برېښنا يوه ستنه په بمونو الوزول شوې او وېجاړه شوې ده.
سرچینه زیاتوي دا پېښه د یاد ولایت په جنګل باغ کې شوې ده.
ياد شرکت په یوه خبرپاڼه کې ویلي، چې د يادې ستنې د جوړولو چارې دوام لري.
د برېښنا دا ستنه داسې مهال په بمونو الوزول کېږي، چې تېره اونۍ د ملي امنیت عمومي ریاست په پروان ولایت کې د برېښنا ستنو د ویجاړولو پر تور د یوې درې کسیزې ډلې مشر نیولی وو.
د ملي امنیت ریاست ویلي وو، چې له یاد کس سره یې درې ملګري هم نیول شوي وو.
د برېښنا شرکت د معلوماتو له مخې په تېرو شپږو میاشتو کې د هېواد په بېلابېلو برخو کې د برېښنا ۳۹ ستنې په بمونو الوزول شوي، چې له دې سره یې شمېر ۴۰ ته ورسېده.
یاد شرکت وایي، دوی ته د ړنګو شویو پایو بېرته رغول ملیونونه افغانۍ زیان واړوه ځکه د دوی په خبره د برېښنا د یوې پایې ترمیم تر ۱۰۰ زره امریکایي ډالر لګښت غواړي.
برېښنا شرکت له عامو خلکو غوښتنه کوي، چې د برېښنا پایو په ساتنه کې ورسره مرسته وکړي.