تاند(شنبه، د سرطان ۱۹) چین په افغانستان کې د امنیتي وضعیت پر خرابېدو اندېښنه ښوولې او خپلو اتباع ته یې ویلي چې ژر تر ژره له دې هیواده ووځي.
چین له افغانستانه د امریکايي ځواکونو د وتلو پر پرېکړې انتقاد کړی او ویلي یې دي چې له دې سره به د ټولې سیمې امنیت له ګواښ سره مخامخ شي.
ځینې چینايي چارواکي شک لري چې امریکا غواړي افغانستان ناامن پرېږدي چې د چینايي ایغورانو په شمول د بېلابېلو هیوادونو سختدریځي په دې هیواد کې پناهځایونه ومومي او چین او منځنۍ اسیا کړکېچنه کړي.
د فرانس پریس خبري اژانس د راپور له مخې، د چین د بهرنیو چارو وزارت ویلي چې په افغانستان کې د جګړو د لا پراخېدو د احتمال په خاطر یې خپلو اتباعو ته ویلي چې ژر تر ژره له افغانستانه ووځي او خپل هیواد ته ستانه شي.
دا وزارت همداراز وايي چې د افغانستان د حالاتو خرابېدا مجبوره کړي چې له خپلو اتباعو داسې غوښتنه وکړي.
څرګنده نه ده چې په افغانستان کې څومره چینايي وګړي اوسي.
ډیری چینایان د قراردادیانو په توګه په پرمختیايي پروژو کې کار کوي.
چین په عین حال کې ویلي چې تراوسه پورې له افغانستانه ۲۱۰ چینایان بېرته خپل هیواد ته ورګرځېدلي چې د هغو له منځه د ۲۲ تنو د کورونا د ازمېښت نتیجه مثبته ختلې ده.
د چین د بهرنیو چارو وزارت په افغانستان کې د خپلو دیپلوماتانو د وتلو یادونه نه ده کړې.