تاند (د سرطان ۱۸مه) — په هېواد کې د حکومت او وسله والو مخالفینو تر منځ د وروستي تاوتریخوالي په لړ کې، له څو ورځو راهیسې د کندهار ولایت په مرکز کندهار ښار کې د شپې له مخې مخابراتی خدمتونه ټکني شوي دي.
له کندهار ښار څخه یوه عیني شاهد تاند ته وویل چې د شپې له ۱۲ بجو څخه د سهار تر ۶ بجو پورې ټیلیفوني خدمتونه ټکني وي او انټرني خدمتونه هم کار نه کوي.
دا لا معلومه نه ده چې په کندهار کې فعالو مخابراتي شرکتونو ته د حکومت وسله والو مخالفینو د خپلو خدمتونو د ټکني کولو خبر ورکړی، که هغوی پخپله په احتیاطي ډول د شپې له مخې خپل خدمتونه ودروي.
په افغانستان کې له لسیزو راهیسې د حکومتونو وسله وال مخالفین د برېښنا او مخابراتو خدمتونه د دې لپاره ټکني کوي چې په حکومت او په ښارونو کې مېشتو وګړو باندې فشار راوړي.
ویل کیږي چې د حکومت وسله وال مخالفین مخابراتي خدمتونه د دې لپاره ټکني کوي چې فکر کوي حکومتي ځواکونه یې د مخابراتي سګنلونو لپاره موقعیت معلوموي او بریدونه پرې کوي، خو عام خلک وایي چې د مخابراتي خدمتونو د ټکني کولو زیان عامو خلکو ته رسیږي ځکه چې حکومتي ځواکونه مجهز مخابراتي خدمتونه او وسایل لري او خپلې ستونزې پرې حلوي.