تاند (پنجشنبه د سرطان ۱۷) د افغانستان د اوبو چارو د تنظیم ملي اداره وايي چې په زابل کې د اوبو او برېښنا د څلورو بندونو د جوړېدو تړونونه د ملي پراختیا له شرکت سره لاسلیک شوي دي چې ډېر ژر به یې د جوړېدو چارې پیل شي.
د دې ادارې د معلوماتو له مخې دمګړۍ د دغو بندونو د لومړنۍ سروې کارونه بشپړ شوي او د تخنیکي سروې لپاره سیمې ته تخنیکي انجنیران استول شوي دي.
دا بندونه د میزاني، مرکوک، آجه کلی او علاوالدین۲ په نومونو یادیږي چې د زابل ولایت په مرکز کې موقیعت لري.
د اوبو چارو د تنظیم ملي اداره وايي د دې بندونو په جوړولو سره ۲۱ میلیون متره مکعب اوبه مدیریت کیږي، ۵۳۶۲ هکټاره کرنیزه ځمکه خړوبوي او د ۳.۵۴ مېګاواټه برښنا د تولید ظرفیت لري.