تاند ( چهارشنبه، د سرطان ۱۶) د افغانستان کرکټ بورډ په کونړ ولایت کې د نجیب الله ترکي په نوم د هېواد د پنځو زونونو ترمینځ د معلولیت لرونکو لوبغاړو شل اوریزه لوبې پيلوي.
د افغانستان کرکټ بورډ د کورني کرکټ څانګې مسؤل احسان الله عبید وایي په دې لوبو کې د افغانستان پنځه زونونه (بند امیر، بست، سپین غر، امو او مس عینک) ګډون لري.
نوموړی وایي، په دې لوبو کې به د افغانستان د معلولیت لرونکو ملي لوبډلې لوبغاړي هم ولوبېږي.
احسان الله عبید زیاتوي، له دې لوبو څخه یې موخه د معلولیت لرونکو ملي لوبډلې ته د پياوړو لوبغاړو غوره کول دي.
د یادونې وړ ده چې دغه سیالۍ به د روانې جولای میاشتې په نهمه نېټه په کونړ ولایت کې پیل او د همدغې میاشتې په ۱۶مه نېټه به پای ته ورسېږي.