تاند (سه شنبه د سرطان ۱۵) په داسې حال کې چې طالبان د کندز د مرکز او علي اباد ولسوالۍ پرته د دې ولایت د ټولو ولسوالیو د نیول کېدو ادعا کوي، خو ځايي چارواکي وايي جګړه هېڅکله د دوی د کارونو مخه نه شي ډپ کولی.
د کندز ولایت د مطبوعاتو دفتر څخه په خپره شوې خبرپاڼه کې راغلي چې د کندز ښار د ماسټر پلان د لومړني سړک د جوړېدو کار پيل شو.
د خبرپاڼې له مخې د کندز سرپرست والي نجیب الله عمرخیل وویل، دوی خپلې دندې ته ژمن دي او په وینا یې که ولسي خلک له چارواکو سره همغږي ولري، جګړه د ټولګټو او نورو پرمختیايي پروژو مخه نه شي نیولی.
ښاغلي عمرخیل زیاته کړه، «دا چې دکندوز ولسونو غوښتنې ته لومړیتوب ورکړشو او د ماسټرپلان عملي کار هم په قوت سره پيلیږي نو پکار ده چې ښاریان يي هم په تطبیق کې هر ډول همکارۍ ته چمتوالی ولري.»
د کندز ولایت د مطبوعاتو دفتر وايي، د دې ولایت سرپرست والي پرطالب وسله والوغږ وکړ چې خپلې وسلې پر ځمکه کېږدي او د افغانانو د هوساینې لپاره کار وکړي.
د چارواکو په خبره د کندوز ولایت د ماسټرپلان لومړۍ برخې سړک د جوړېدو چارې به په ۱۴ میاشتوکې بشپړې شي.