تاند(سه شنبه، د سرطان ۱۵) تورخم دروازه د ټولو هغو افغانانو او پاکستانیانو پر مخ خلاصه ده چې غواړي خپلو هېوادونو ته لاړ شي.
دا څرګندونې د افغانستان لپاره د پاکستان ځانګړي استازي محمد صادق کړې دي.
نوموړي پر خپل ټویټر لیکلي چې تورخم لار دغه راز د محصلینو، ناروغانو او د ټولو سوداګریز او ترانزیتي توکو پر مخ خلاصه ده.
صادق خان یادونه کړې چې په ټولو مواردو کې باید د کورونا وبا اړونده مقررات مراعات شي.
د ویلو ده چې وړاندې تر دې یو شمېر رسنیو د پاکستاني چارواکو له خولې ویلي وو چې پاکستان د کورونا وبا د پراختیا مخنیوي لپاره تورخم دروازه له محصلینو پرته د ټولو مسافرو پر مخ تړلې ده.