تاند ( سه شنبه، د سرطان ۱۵) اروپايي ټولنې له قحطۍ سره د مبارزې لپاره له افغانستان سره د ۳۰ ملیونه ډالرو مرسته اعلان کړې ده.
د یادې ټولنې ویاند بلاز اویواري په یوه خبري کنفرانس کې ویلي، چې په افغانستان کې وچکالي مخ پر زیاتېدو ده او شاوخوا ۱۱ ملیونه افغانان د خوړو د خوندیتوب له کمښت سره مخ دي.
سرچینې ویلي، چې دوی له قحطۍ سره د مبارزې لپاره افغانستان ته ۳۰ ملیونه ډالر ورکوي څو د اړمنو خلکو لاسنیوی وشي.
دوی وایي په دې مرسته کې به هغه ۳ ملیونه وګړو ته خواړه ورسېږي، چې د قحطۍ له امله د خوړو له کمښت سره مخ دي.
اروپايي ټولنې ویلي چې دوی به په بشري برخه کې خپلو مرستو ته دوام ورکوي.
یادې ټولنې داسې مهال د دغې مرستې اعلان وکړ، چې اوسمهال په افغانستان کې روانو جګړو او وچکالۍ ګڼ افغانان ځپلي او دې مسئلې سختې اندېښنې پارولې دي.
عام افغانان هم له حکومت نه د مرستو غوښتنه کوي.
دوی وایي د جګړو سره سره وچکالي هم هغه ستر عامل دی، چې له ډېری خلکو یې مېنې واخیستې او اوس په سختو حالاتو کې ژوند لري.
د دوی په خبره که حکومت له اړمنو سره مرسته ونه کړي ښايي وضعیت تر دې هم بدتر شي.