تاند (یکشنبه د سرطان ۱۳) د افغانستان د بهرنیو چارو وزارت وايي، ملګرو ملتونو د افغان پولیسو نوم د یاد سازمان له «بدنام لېست» څخه اېستلی دی.
دغه وزارت نن یکشنبه د ملګرو ملتونو سازمان د دغې پرېکړې د هر کلي ترڅنګ په یوه اعلامیه کې ویلي چې د ملګرو ملتونو سرمنشي په ۲۰۲۰ کال کې د ماشومانو او پوځي شخړو په اړه راپور کې د ماشومانو د ګمارنې او ماشومانو په وړاندې تاوتریخوالي مخنیوي برخه کې د افغانستان د پولیسو د عمل پلان تطبیق بریالی بللی و.
د ملګرو ملتونو سازمان په ۱۳۸۹ کال کې په جګړه کې د ښکېلو پولیسو په لیکو کې د ماشومانو د حضور له امله د افغانستان نوم په دغه لېست کې داخل کړ.
د افغانستان د بهرنیو چارو وزارت په اعلامیه کې همدارنګه له نړیوالو بنسټونو او نورو هیوادونو څخه غوښتل شوي چې پر طالبانو او نورو وسله والو ډلو باندې فشار وارد کړي څو د ماشومانو پر واندې له تاوتریخوالي لاس واخلي او په جګړیزو لیکو کې یې له ګمارلو څخه راوګرځوي.
ولسمشر اشرف غني د یوه فرمان په ورکولو سره په پوځي لیکو کې د ماشومانو ګمارل جرم ګڼلی دی.