تاند ( یک شنبه، د سرطان ۱۳) د روغتیا د نړیوال سازمان ځینو چارواکو ویلي، چې لا هم په افغانستان کې د کورونا ویروس خطر پر خپل ځای دی او داسې ښکاري، چې د کورونا هندۍ بڼه د پراختیا په حال کې ده.
د دغه سازمان چارواکو ویلي خلکو ته په کار ده چې د کورونا لپاره وضع شوي تدابیر مراعات کړي، ټولنیز واټن وساتي او ماسک وکاروي.
دا په داسې حال کې ده، چې د افغانستان د عامې روغتیا وزارت هم ویلي، چې د کورونا مثبتې پېښې مخ په ډېرېدو دي او هېوادوالو ته په کار ده چې روغتیايي سپارښتنې عملي کړي.
د افغانستان د عامې روغتیا وزارت د واکسینو د وېش خبره هم کړې وه او ویلي یې وو چې دمګړی د کورونا ویروس واکسین هېوادوالو ته وېشل کېږي او ښایي په دې سره مثبتې پېښې کمې شي.
د افغانستان د روغتیا وزارت د وروستیو معلوماتو له مخې، تر اوسه په هېواد کې پر کورونا د اخته کسانو ټول شمېر ۱ لک او ۲۴ زره او ۷۵۷ ته او د مړه شویو هغه بیا ۵ زره او ۱۹۹ ته لوړ شوی دی.
تر دې دمه د کورونا د مخنیوي پر هڅو نیوکې ډېرې دي خو یاد وزارت ویلي چې په هېواد کې د تور قارچ په نامه د کورونا نوې او خطرناکه بڼه خپره شوې ده او عام خلک باید حتمي روغتیايي سپارښتني عملي کړي.