تاند ( شنبه، د سرطان ۱۲) د اروپا فوټبال اتلولیو په کواټر فاینل لوبو کې هسپانیا سویزرلنډ او ایټالیا، بلجیم ته په ماتې ورکولو سره نیمه پای لوبو ته لاړې.
د هسپانیا او سویزرلنډ ترمنځ په زړه پورې لوبه ترسره شوه.
په دغه لوبه کې تر ۹۰ دقیقو لوبه ۱-۱ مساوي پای ته ورسېده، چې دواړو ته د ۳۰ اضافي دقیقو وخت ورکړل شو خو بیاهم کومه لوبډله په ګول وهلو بریالۍ نه شوه.
په دې سره پينالتي شاټونه ترسره شول او هسپانیا د ۳ په ۱ ګولونو سره بریا خپله کړه.
په بله لوبه کې چې د ایټالیا او بلجیم فوټبال لوبډلو ترمنځ ترسره شوه، په کې ایټالیا وتوانېدله د نړۍ لومړی مقام لرونکي لوبډلې بلجیم ته ۲-۱ ګولونو ماتې ورکړي.
په دغه لوبه کې لومړی ګول د ایټالیا له لوري «نیکولو بریلا» په ۳۱مه دقیقه کې وواهه او دغه راز یې په ۴۴مه دقیقه کې د «لورینزی انسینیا» په مرسته دوهم ګول وواهه.
د یادونې ده چې له دې وړاندې د یادو سیالیو په شپاړسم پړاو کې د تېر نړیوال جام ګټونکې لوبډله فرانسه، د تېر اروپا فوټبال اتله لوبډله پرتګال او دغه راز د جرمني او نیدرلنډ په څېر سترې لوبډلې له اروپا فوټبال اتلولیو بهر شوي دي.
په روانو لوبو کې دوهم کواټر فاینل لوبې د چک جمهوریت او ډنمارک او دغه راز د اوکراین او انګلستان لوبډلو ترمنځ ترسره کېږي.