تاند (یکشنبه د جوزا ۳۰) د پروان سلګونو اوسېدونکو په دې ولایت کې د وسله والو طالبانو د بریدونو له زیاتېدو سره هممهاله د دغه ډلې پر وړاندې وسله پورته کړې او وسله والو طالبانو سره د جګړې لپاره غوربند ولسوالۍ ته تللي دي.
د پروان د والي ویاندې وحیدې شهکار په وینا چې د دغو کسانو شمېر ۵۰۰ تنو ته رسیږي او له سیمه ییزې ادارې سره په همغږۍ د افغان ځواکونو د ملاتړ په هدف د پروان په نا امنیه سیمو کې ځای پر ځای شوي دي.
هغې زیاته کړې، دغه ولسي وسله وال د پروان د والي، قومي مشرانو او په ځانګړي ډول د ولسي جرګې له خوا رامنځته شوي دي او مشري یې افغان امنیتي ځواکونه کوي.
په ولسي جرګه کې د پروان ولایت استازي عبدالظاهر سالنګي ویلي، که اړتیا پیدا شوه په دغه ولایت کې به د افغان ځواکونو څخه د ملاتړ په هدف نور ولسي پاڅونوال هم چمتو او د طالبانو د ځپلو لپاره به بېلابېلو سیمو ته ولېږل شي.
هغه انځورونه چې د پروان ولایت مقام د مطبوعاتي دفتر له خوا خپره شوې لیدل کیږي چې دغه کسان په سپکو او درندو وسلو سمبال دي.
د ولایتي چارواکو په وینا په دې وروستیو کې د پروان ولایت په شینوارو او سیاه ګرد ولسوالیو کې د طالبانو فعالیتونه زیات شوي چې په خبره یې دغه فعالیتونه د افغان ځواکونو لخوا دفعه شوي دي.
د پروان د والي ویاندې زیاته کړې، ټاکل شوې په نژدې وختونو کې د غور بند درې څلورو ولسوالیو ته تازه دمه مرسته کوونکي سرتیري هم ولېږل شي.
پروان نهه ولسوالۍ لري چې د کوه صافي، شینواري، سیاه ګرد او بګرام او جبل السراج ولسوالیو په ځینو سیمو کې طالبان حضور لري.