تاند ( پنج شنبه، د جوزا ۲۷) د هرات په اوبې ولسوالۍ کې له تېرو څو ورځو راهیسي یو شمېر امنیتي سرتېري د طالبانو په کلابندۍ کې دي.
د کلابند سرتېرو د کورنیو غړو نن په دغه ولایت کې د ولایت مقام مخې ته اعتراض کړی او د لارو د بندولو تر څنګ یې ټایرونو ته هم اور ورته کړی دی.
دوی له حکومت څخه د خپلو کورنیو غړو ته، چې د طالبانو په محاصره کې دي د بېړنۍ مرستې غوښتنه کوي.
اعتراض کوونکي وایي، کلابند سرتېري په ډېر بد وضعیت کې قرار لري.
دوی زیاتوي، اولادونه یې تجهیزات څه چې آن ډوډۍ نه لري او هغوی د ډوډۍ پر ځای د ونو پاڼې خوري.
معترضین د کلابندو سرتېرو شمېر ۴۰ تنه یادوي او ادعا کوي، چې حکومت یادو سرتېرو ته هېڅ پام نه دی کړی.
بل لورته بیا د هرات سیمه ییزو چارواکو تر اوسه په دې اړه څه نه دي ویلي.