تاند (سه شنبه د جوزا ۲۵) د افغانستان د ملي امنیت شورا د ناټو د سرمشریزې اعلامیې ته په اشارې سره وايي چې له افغانستان څخه د بهرنیو ځواکونو له وتلو وروسته هم له افغان ځواکونو څخه ملاتړ او د هغوی روزنه به دوام وکړي او په دې برخه کې به د افغانستان له حکومت سره لازمې سلا مشورې وشي.
تېره ورځ په بروکسل کې د ناټو سرمشریزې د غونډې په پای کې دغه سازمان په یوې اعلامیه کې له افغانستان څخه د بهرنیو ځواکونو له وتلو وروسته د اړیکو د نوي باب په پرانیستلو، د افغانستان له دولت او خلکو څخه د ملاتړ په دوام، د افغانانو په مالکیت د سولې پروسې او د افغان امنیتي او دفاعي ځواکونو ترڅنګ ودرېدلو باندې ټینګار کړی دی.
په اعلامیه کې راغلي چې ناټو به په افغانستان کې خپل ملکي حضور ته دوام ورکړي. دغه سازمان د کابل د حامد کرزي نړیوال هوايي ډګر د امنیت په ساتنې هم توافق کړی دی.
د افغانستان د ملي امنیت شورا ویاند رحمت الله اندړ نن سه شنبه وویل: “د افغان ځواکونو مالي ملاتړ، له هېواده د باندې یې روزنه، دلته د غیرنظامي بهرنیو ځواکونو دوامداره حضور او د هوايي میدان په شمول د مهمو بنسټونو د امنیت په تامین کې د نړیوالې ټولنې مرسته هغه څه دي چې موږ ټول یې واضح یادولی شو”.
ښاغلي اندړ ټینګار وکړ چې د کابل نړیوال هوايي ډګر په ګډون د افغانستان ټول هوايي ډګرونه به له نړیوالو معیارونو سره فعاله پاتې شي.
هغه زیاته کړه چې افغانستان به هغه لاره انتخابوي چې د دغه هېواد لپاره ملموسې ګټې ولري.